حقيقي مصر أم الدنيا

كانت واحده من قريباتي اللي عايشه بره مصر واللي هتنزل مصر قريب ان شاء الله,

بتكلمني وبتشكي من المعامله هناك على إنهم أجانب ,حاجه تحزن والله,حسبي الله ونعم الوكيل,

في الآخر قولتلها خلاص معلش هانت أديكي سايبه البلد وجايه,

فانتقل حوارها في التو واللحظه عن الحال في مصر وانه حال مايسرش ابداً,

فقولتلها بصي بقى مصر أم الدنيا,

فاستغربت من ردي وبدأت تحكيلي عن قريبتنا التانيه اللي عايشه معاها في نفس البلد واللي لسه راجعه من أجازتها في مصر,

وبتقولي إنها أول ما نزلت مصر رجلها اتكسرت واتجبست,

فقولتلها برضه مصر أم الدنيا,

قالتلي ده حتى موبايلها ما سلمش واتفيرس واتمسح كل اللي عليه,

قولتلها برضه مصر أم الدنيا,

تقولي ده جرالها وجرالها وحصل وحصل,

وأنا أعيد وأزيد برضه مصر أم الدنيا,

قالتلي أنها راجعه زهقانه ومتضايقه على الآخر وبتقولها أنا رجعت علشان آخد أجازه هنا من اللي حصل في مصر,

قولتلها أنا برضه مازلت مقتنعه جداً بأن مصر أم الدنياااااا,

وهي مستغربه من كلامي وباين عليها كده كان نفسها تقولي أنتي مجنونه,

وفي آخر المكالمه,

قولتلها عموماً ربنا يهوّن ويصبّرنا,هي الدنيا كده حقيره, وهي دار للإبتلاء وكلها منغصات,

و مصر أم الدنيا دي بقى,

ضحكت وقتها وفهمت كلامي,

وقالتلي حقيقي مصر أم الدنيا,

قولتلها أنا زمان ماكنتش فاهمه ليه مصر أم الدنيا,لكن دلوقتي الوضع مختلف ,

أنا دلوقتي مقتنعه جداً بأن مصر أم الدنيا,

دلوقتي بقووووول من كل قلبي وبقووول للناس كلها مصر أم الدنيا عرفتوا ليه؟

******************

أسألكم بالله العظيم أن تدعوا لي ولأهلي,وأن تدعوا لأخي ياسر بأن يعجل الله شفاءه شفاءاً لا يغادر سقماً ويرزقه وإيانا الرضا والصبر الجميل ويفرّج كربنا ويكشف غمنا قريباً.